In Bonabéri hei mir a der houptstrass gwohnt. We mir vom Huus us gäge Süde gloffe sy, sy mir gly zu Sanddüne cho. I de letschte Jahre wo mir dört gwohnt hei, isch dört e riisigi Düngerfabrik ufgstellt worde. Es het dört nid so Vorschrifte wi ir Schwytz, was Luft u süsch Verpestig vor Umgäbig betrifft. Drum het's zwüschyne, je nach Wind, eim vom Gstank u Gift ir Luft grad Träne i d'Ouge gjagt. Es het so starch nach Azeton gstunke... Hinger dere Fabrik isch nach öppe hundert Meter der Wouri cho u wyter vore, s'Meer. Es isch dört es Gmisch gsy vo Salz u Süess Wasser...D'Eltere hei üs eigetlech verbotte gha dört go z'bade wüu öppedie Chinder verschwunde sy. Es het dört Verschiedeni Tier u Fischarte gha. Ja, dört hei sech Haie u Krokodil troffe. Mir sy immer wieder mit Nachbarschinder unger dä Zuuhn düre, näb der Fabrik a dä Strand. Dört het me wyt use im Wasser chönne loufe. Eines Tages wo mir wieder dört sy go bade, hei si der Strand wägbuddlet gha. Si hei en Aalegestell für grossi Schiff gmacht u wüu's eh es privats Grundstück isch gsy, hei si nüt müesse aaschrybe... Zum Glück het my gross Brüetsch guet chönne schwüme. Mir hei zäme drü Chinder müesse usezieh. Si wäre alli ungergange, hei nid chönne schwümme. Z'ersch di Chlynschti, nächär, di Mittleri u z'letscht di Gröschti. Mir hei natürlech Daheime nüt dörfe säge...O wieder Bewahrig...