Am 07.45 Uhr han ig müesse ir Onkologie sy für d'Bluetentnahm. Der Kurt het mi gfahre u isch grad wyter uf Willisau. Am 08.20 Uhr bin ig uf e Notfall begleitet worde wo nen Anästhesist u d'C. gwartet hei. D'C. isch d'Muetter vom ne früechere Schuelkolleg vo eim vo myne Söhn. Über ne Stund het är probiert das Ding i my rächt Arm yne z'bringe. Es isch eifach nid gange. Wo du no ne Anästhesistin cho isch, hei si z'ersch wyter rächts probiert u du nachdäm ig ha afa jammere, ufgäh. Jedesmal wenn är a ne Vene cho isch, isch die platzt...I ha halt sooo fiini Vene...Am linken Arm isch es nach paar Aaläuf ändlech gange.
Der P. het mi am 10.30 Uhr bym Spital abgholt. I ha by ihne dörfe liege u d'R. het Zmittag gkochet. Der Verband am Arm het düreglah, es het by der Ystichstell nacheblüetet. Nach em zmittag sy mir ume is Spital. Uf der Onkologie, het mir d'Frou B. der Verband gwächslet. Es sygi guet syg i cho. Nach em ne feine Latte Macchiato by R. & P. het mi der P. am 14.30 Uhr zur C. id'Oberstadt bracht. Si het mir mit paar gekonnte Griffe der Äcke ume glöst. Am 15.00 Uhr het mi my Schatz abgholt. Uf em Heiwäg het er no paar Kommissione gmacht. Churz vor em Vieri isch d'B. uf Bsuech cho. I bi no chly blibe liege. Mir hei du zäme Kirschichueche gmacht u ig bi ume go liege. Zum Znacht han ig nume nes haubs Stück möge. Mir tüe d'Arme so weh! I mache jetz mym Name alli Ehr u by würklech beidsytz bläuer...I mag Hüt nid no meh schrybe...