I ha scho erwähnt, dass d'Lehrer in Kamerun drygschlage hei. Ja, my füftklass Lehrer dä het de gärn u viu drygschlage. Jede Morge hei paar Giele use müesse go grüeni Stäcke sueche. Wenn si nid gnueg grüen sy gsy, de het der Lehrer ihne di Stäcke uf em Rügge verbrätschet bis si verhützt sy gsy. Es het aube wenig bruucht, dass är gschlage het. I ha einisch e Tinte Fläcke i mys Heft gmacht. Da het är ändlech e Grund gha mi z'schlah. Er het mi so fescht ghoue, dass ig grad s'Duumeglänk broche ha gha. Mys Mamie het drufabe e Brief gschrybe. Der Lehrer het ne verschrisse u gseit: "di söu säuber cho" Er isch sech nid gwöhnt gsy, dass sech d'Eutere um ihri Chinder kümmere. S'Mamie isch am nächschte Tag mit mir id Schueu. Obwohl si nid gschumpfe het, isch der Lehrer ganz tuuch gsy. Si het ihm erklärt, dass är ir Schwytz vor Gricht müesst. U het ihm gseit, dass es längi we me mit mir schimpfi, wenn ig öppis schlächt machi. Si het ihn zum Zmittag yglade und är het zu myre Verärgerig, mys Elektropiano übercho. Da het är versproche, dass är mi nümme hout. Är het en anderi Lösig gha. Är het mir es Blatt ggäh u ig ha müesse, wenn är use isch, Strichli mache vo dene wo glaferet oder süsch dumm tah hei. Die hei de Strichli entschprächend Schläg übercho. So isch es cho, dass ig i jeder Pouse vo de Schüeler bi zämegschlage worde. Es isch ihm gly zu Ohre cho. Syni reaktion isch gsy, dass är mi zu sich zitiert u gseit het: " wenn Di öpper schlaat u du mir das nid seisch, de schlaahn ig Di!" Eh, ja zum Glück han ig di Füfti nid müesse dört fertig mache. Mir sy vorhär zrügg id Schwytz.
Dä Lehrer het mi im Jahr 1999 gsuecht u in Bigle bsuecht u isch ganz erstuunt gsy, dass ig nid voll Begeisterig über si Bsuech bi gsy. Är isch im Kosovo als Friedenssoldat stationiert gsy u het in ganz Europa gratis dörfe umeflüge...