I bi aube nach em Zmittag mit em Velo dür's Quartier gfreeset. Einisch bin ig bir Quartierschuel düregfahre u der Lehrer het mi härezitiert. Es isch en Erschti Klass gsy u ig bi öppe denn ir Vierte gsy. I ha müesse mit em Stäcke d'Buechstabe aazeige u d'Chinder hei ne im Chor müesse usrüefe. Der Lehrer isch i dere Zyt eis go zieh...
I bi o sehr gärn öppedie i d'Krankestation vom Quartier go luege, öb ig irgendwie öppis chönnti hälfe.
I üsem Quartier isch sehr viu los gsy. S'Läbe het sech uf der Strass abgschpielt. Im Nachbarhuus isch tatsächlech d'Polizei ein Erwachsne Maa cho hole wo nes vier Jährigs Meiteli vergwaltiget het. I ha sogar Mau mit müesse zueluege, wi vier Giele di chlyni drü Jahrigi Louise gha hei u der Petit Pierres e nün Jährige Nachbarsgiel uf se här isch...Da bin ig nümme z'halte gsy u ha richtig dry gschlage. I bi denn o Nüni gsy.
Ab zäh jährig isch es für mi schwierig worde mit de Manne, da ig schnäll gwachse bi u me guet gseh het, dass ig e Frou bi. O myni Fründinne us em Quartier sy Eini nach der Andere zu ihrem Maa gschickt worde. Erbaba isch Elfi gsi, wo si sech vo ihrem 39 jährige Maa het müesse go la schwängere u nächär i sys Harem verschwunden isch. Mit Zwölfi han ig nümm wölle in Kamerun blybe. I wär nach der Füfte Klass is Lycée cho u wär dört unger fasch 3000 Jugendlechi di einzigi wyssi Frou gsy. I ha gwüsst, dass es gang u gäb isch, dass Modis ir Schuel vo de Lehrer oder Mitschüeler sy vergwaltiget worde...
I ha o dört jede Tag Bewahrig erläbt!
Der Papi isch schwär krank worde. Er het e ganz e starchi Malaria düregmacht wo sy Härzmusku het lah entzünde. Zuesätzlech het er Filariose ufgläse. Das sy Haardicki Würm wo vo re Flöige übertrage wärde u sech unger der Hut sehr schnäll vermehre. So sy mir aus ganzi Familie im 1976 id Schwyz zrügggreist.