I ha ja s'Morphium abgsetzt u mit Methadon ustuuschet. Da ig schlächti Läberewärte gha wägem Methadon han ig gester no ne Termin gha bi der Schmärzärztin gha. I ha jetz es anders Mittu , Palexia, won ig hoffe dass es de besser aspricht. I ha Hüt am Morge am Achti ir Apithek s'nöie Mittu bstellt.
I ha nach em Zmorge mit em Grandmaman telefoniert u mir hei nid realisiert, dass si sött ässe. Nach ere Stund het öpper bi ihre wölle abruume...I ha du aaglütte, öb ihre öpper chönnnti der Kaffi wärme. Si isch ganz erstuunt gsy, dass si nid gschumpfe hei...si isch drum i Einzuhaft, wi si seit. Si darf nüt us em Zimmer. Es het es paar Coronafäll im Landblick u drum hei si alli testet u i quarantäne gsetzt. I bi gspannt wie lang. Es isch würklech schlimm, was si da de alte Mönsch aatüeh! Tierliquählerei
nennt das d'Grandmaman.
Hüt am Mittag hei mir Bsuech gha. Es isch fein gsy. Rindsbraten z'ersch aabrätlet u nächär 3 Stund bi 130 Grad mit Beichnöche, Rüebli, Zibele, Tomate im Ofen gschmoret. Derzue, Rüebe u Zuckerhuet z'erscht blanchiert u nächär mit Café de Paris gwürzt, s'Einte mit Olivenöl u s'Andere mit Anke o im Ofe gschmoret. Us Bylag hei mir no Ebli gha...
Nach ere Siesta hei d'Sarah u d'Flavia d'Ychäuf u o mys nöie Mittu bracht. Si hei no es Kaffi gno u pläuderlet.
I bi so froh, muess ig nid im Spitau sy, süsch wär ig ja o isoliert.