I ha wieder chönne düreschlafe, i mym Bett. Das het sooo guet tah!
Wie geng bin ig uf, go üsi Kaffees uselah. Am Kurt, es Cappucino u mir, es Latte Macchiato. Das han ig im Spital am meischte vermisst, Mi Maa, d'Familie u Latte Macchiato. A eim Tag het mir e Pflegendi Person eis bracht gha.
Am 6.10 Uhr isch der Stephan zum Kaffee cho u am 6.30 Uhr der David. D'Sarah isch zum Znüni cho u der Matthias de zum Zmittag. I bi so gsägnet, myni Familie ir Nächi z'ha.
Zum Zmittag han ig e feini Rüeblisuppe gmacht, d'Räschte vom Louchgratin mit Späck ufpept u nomau i Ofe tah u derzue Ebli kochet.
Jetz fahrt mi de d'Sarah uf Burgdorf won ig mi mit der Onko-Psychologin u aaschliessend mit der Schmärzärztin triffe. Es isch gäbiger alles am glychen Ort z'ha, drum han ig is Schmärzzentrum vom Spital gwächslet. Für Hei z'gah holt mi de d'R. Si nimmt de grad ihre Maa mit u si chöme zäme zu üs cho Znacht ässe. I freue mi druf.