In Bonabéri het's es Huus gha a der Strass wo Kamerun mit em Süd-Weste vom Land verbindet. Es isch zmitts im Quartier wo sech links u Rechts vo dere Strass immer meh gäge Busch usbreitet het. Zu dere Zyt het's ganz viu Hüttene gha us Wällbläch oder settigi us Bambus mit Lätt u mit Palmblätterdach. Uses isch es Bachsteihuus gsy mit Gitter statt Glas a de Fänster u Türen us Holz wo mit der Zyt mit Türen us Stahl usgwächslet sy worde. Myni Eutere hei bis churz vor üsere Rückreis nach Kamerun nid gwüsst, öb si wyterhin vor GFU usgsändet wärde u hei darum e Büecherlade organisiert wo si im Hüüs hei Ygrichtet. Es sy Lüt us allne Missione bi üs Biblene oder süsch christlechi Literatur sy cho ychoufe. Sogar di Katholische wo gfunde hei, ihre eiget Büecherlade sygi ihne "z'Wäutlech" worde.
Es het ke Tag gäh wo nid irgend e Missionar oder süsch e Passant bi üs am Tisch mitggässe het. Ig sälber ha meistens mys Täller gfüllt u bi das irgend ere Nachbarsmuetter go bringe u ha mit ihrne Chinder am Bode us ihrem Top mitggässe. Es isch bekannt gsy, dass wenn öpper us der Umgäbig es Problem het gha, sygi's Medizinisch oder Logistisch, de het der Papa oder d'Mamma Spörri immer Rat gwüsst oder grad ghandlet. Da chunnt mir es Chind i Sinn wo sech mi heissem Öl s'Gsicht verbrönnt het u uf em Wäg is Spital immer wieder ufgstönet het, bis ig gmerkt ha, dass ihm d'Muetter Chilli id'Ouge rybt, dass es nid id Schnitz gheit. Mys Mami het du usgrüeft u ihre befohle sofort ufz'höre...Das Chind hets mit Gruusige Narbe überläbt. Si hei denn Sand is Gsicht gströit gha.
I ha immer wieder Abszässe gha wüu ig myni Muggestiche bis zum Bluet ufgkratzet ha u viu im Dräck umegumpet oder mit em Velo umegfahre bi. I ha ne schlächti Narbebiudig. E Zyt lang han ig einisch ir Wuche mit em Taxi is Spital müesse go Extanzillin sprütze. Das isch aube sehr schmärzhaft gsy, vor allem wenn si mir der Ischiassnärv breicht hei. Si hei mir drum i Gsässmuskel müesse sprütze.
D'Afrikaner hei viu di herteri Huut u de hei mir aube die wo gschprützt hei z'ersch e Box ggäh u nächär gschprützt. I bi meischtens nächär dört chnütschblau gsy...
Einisch bin ig mit em Velo Hei gfahre u churz vor üsem Huus vom ne Outo aagfahre worde. Mys Mami het öppis ghöre chlepfe u wo si füregluegt het, grad e Frou gseh im ne Outo wo düregfahren isch wo mit grossen Ouge u vor Schreck d'Hand vor's Muul gnoh het. Si isch füregschrpunge u het mi grad chönne im Strassegrabe zämeläse. Si hei mi mit em Sytespiegu vom Outo am Ellbo aatütscht gha u ab der Strass gschpickt...I ha Gott sei Dank nüt broche gha, bi aber rächt gschürft gsy, o vom umgheie.
Wenn aube di grosse Laschtwäge sy cho z'freese, de het es entgägekomnigs Outo no grad Platz gha aber kes Velo oder Fuessgänger. Es het immer wieder verletzti Lüt i de Strassegräbe gha. Mir hei jede Tag Bewahrig erläbt!