Hüt am Morge sy der Kurt u ig ir Insel gsy bi der Onko Radiologie. Mir sy go bespräche wie was u wenn bestrahle.
Es isch e kompetänti Arztin gsy wo üs alles erklärt het. Si wärde eigetlech der ganz Rügge bestrahle. I erkläre's de, we's so wyt isch.
Am 12.45 Uhr han ig ir Onkologie e Termin gha. D' E. het Hüt zu mir gluegt. Z'erscht e Bluetentnahm, nächär en Ungersuechig u nes Gschpräch bym Onkolo u schlussändlech d'Chemo. Irgendwie isch öppis mit de Läberwärte gsy, si sy erhöht, drum het der Dr. d'Dose vor Chemo um'ne Viertu abetah. D'E. het mir auso d'Chäutehube aagh'leit, d'Leitig aagschlosse u fängs Cortison gäge s'Schlächtsy yneglah...nächär het si es Mittu für d'Chnochedichti u später Chochsalzlöig yneglah bis di erschti Haubstund düren isch gsy. Drufab het si d'Chemotherapie i eire Stund chönne ynelah. Nächär het si ume e Haubstund mit Chochsalzlösig müesse spüehle u de isch d'Hube im ganze zwöi Stung druffe gsy. Im Momänt gheije mir scho e chly Haar uus. I ha ja dichts u viu Haar.
Vor alle die Mittu gäge s'Schlächtsy mache meeegaaa müüüed! I ha chuum chönne mit der E. rede ohni dass mir d'Ouge zuegheit sy. Am haubi Füfi isch der Kurt mi cho hole u mir sy no ir Apithek go ne ganze Sack vou Medis hole.
"Iii mmaaag eifach nit" no öppis im Buech schrybe, Morn de wieder...