In Tiko sy mir gloub 48 Schueler gsy, ir erschte Klass. In Neueburg sy mir 16 gsy u in Douala, won ig du di erschti fertig gmacht ha 75. D'Schuel in Douala het gheisse: école petit Joss. D'Franzose hei grad i dere Zyt im ne andere Quartier e eigeti Schuel boue. Myni Eutere hei di nöii Schuel nid vermöge. Im petit Joss sy d'Chind vo vermögendere Kameruner ygschuelet worde. Di ganz Ryyche hei se zu de Franzose gschickt. Im petit Joss het's alles kamerunischi Lehrer gha. Es isch nach frannzösischem Systhem u mit Büecher us Frankrych Schuel ggäh worde. I ha mit den Afrikaner ir Gschicht glernt: d'Gallier üsi Vorfahre...Es isch gang u gäb gsy, dass d'Lehrer drygschlage hei. Es het mi tüecht, dass wenn e Lehrer nid gschlage het, är bi den Eutere als schlächte Lehrer goute het. Ir dritte Klass isch üsi Lehrere o grad Diräktorin vor Schuel gsy. Ihre Suhn isch mit mir ir Klass gsy. Dä het Mau mit em Yselineal so starchi Schläg übercho, dass er grad het müesse go s'Loch im Chopf näihe.