Ja, hesch richtig gläse...i ha my erscht Fründ im Chindsch gha. Mir hei denn Hochzyt gha u är isch aus Zeiche, aube am ne Namittag mit mir u mym Bäbywage dür d'Gasse vo Neuch zoge. Soviel ig weiss, söue mir das monatelang dürezoge ha...bis mir i separati Schuele söue yteilt worde sy.
I ha's zur beschte Erschtklasslehrere breicht won ig nume ha chönne. Si isch säuber es Missionschind gsy u het mi druf vorbereitet für wieder z'gah. O wägem Schrybe het si mir o ghulfe. Zu dere Zyt het me d'Linkshänder "umgschuelet". I dere Klass sy mir 16 Schüueler gsy u dervo het's 9 Linkshänder gha. De het si's grad lah sy. Mir sy Linkshänder blybe.
I bi im schönschte Schueuhuus vo Neuenburg gsy. Grad näb em Hafe. Das isch lang der Inbegriff, mys innere Biud gsy vor Schueu ir Schwyz.