So vo wäge Arztgheimniss, Schwiegepflicht un Persönlechkeitsschutz u so...i schrybe dä Blog für myni Gschicht z'verarbeite u im Momänt spiut si sech im Spital ab...I tue kener Näme nenne ussert die vor Familie.
Hüt isch e müede Tag gsy. I bi viu uf FB gsy u ha o nes Gschichtli da dry gschrybe. A Namittag hets gheisse der Arzt wetti Blut für z'luege wäg de Entzündigswärt. I bi voll derfür gsy, dass zwöi Pflegefachfroue mi Port aastäche. Es het guet usgseh, dass es chönnti klappe. Er liegt so wyt underem Arm. Normalerwys isch fasch bym Schlüsselbei...Es isch nid gange. I ha mit ihne abgmacht gha, dass si einisch probiere u we's denn nid geit, s'Bluet angerswyttig näh. Si hei mir du eis Röhrli links u eis rächts useglah. Das Bluet wird jetz "kultiviert"...öb irgendwo en Entzündig umen isch...
Der Kurt isch vo Wilderswil nach em Zmittag, diräkt zu mir cho. Syni Nächi het mir guet tah. Er het mir ganz viu Säft u süsch feini Getränk bracht, vo Stöcklis gspendiert. Mmmh! i ha scho Biresaft gno, megafein gsy! Merci viu Mau!