Myni Eutere hei e Ruef gha füre frankophone Teil vo Kamerun. Darum hei si entschiede, dass si üs in Französisch yschuele. Si hei in Neuenburg/Neuchâtel e billigi 3 Zimmer Wohnig gfunde. Di meiste Brüeder vom damalige Missionsrat hei nid französisch gredt u hei das o nid gseh, dass d'Mission in Kamerun näbst em Änglische, jetz o no im Französisch Teil ungerstützt würd. Am Papi sy d'Gmeinde vo Langnau, Signau u Konolfingen zur Betreuig in Uftrag gäh worde. Är het in Signau, im Hasli es Zimmer zur verfüegig gstellt übercho. Der Papi isch fasch zwöi Jahr, am Frittigabe Heicho u am Samstigabe ume is Hasli. I bi also nach der erschte Klass in Englisch, in Tiko z'Neuenburg i wäutsch Chindergarte cho. Das het mir gfalle, so viel Spieli won ig no nie gseh ha u alli Chinder sy wyss gsy! D'Chindergärtnerin isch fan gsy vo mir. I sygi so begeisterigsfähig u stecki di andere Chinder aa mit myre Fröid. Leider isch die Chindergärtnerin Chrank worde u der räschte vo däm Chindergartejahr isch sehr schwierig worde für mi. Mys Mamie isch o grad i dere Zyt schwähr Chrank worde u het nach ere Operation no zwöi Monet i d'Erholig müesse. De Mäni isch für zwöi Monet zu Fründe is Ämmitau, uf Grosshöchstetten id Ferie. Es jüngers Chinderloses wältsches Lehrerehepaar isch zu üs cho. Si sy für mi gfüeut drüü Mönet, es syg für füf Wuche lang bi üs gsy u hei üs wöue erzieh. Es paar Jahr später, wo si sälber Chinder hei gha, hei si myre Muetter aaglütte u sich entschuldiget für ihres Verhalte üs gägenüber. Mir syge ganz liebi Chinder gsy, im Gägesatz zu ihrne... Im Chindergarte isch ganz en anderi Frou cho wo gfunde het, das göng gar nid! I meini di andere Chinder müessi nach myre Pfyffe tanze...