Ja, es geit nid immer so wie's mir üs wünschte...I ha ja hüt mit myre Therapie chönne wytermache.
Bym Aastäche vom Port het's eifach nid wölle klappe. Die für mi zueständigi Pflegefachfrou het versuecht ne aaz'stäche u ne nid gfunde, di Armi. U ig bi eifach i Tränen usbroche, so blööd. Si het mir du am Arm Bluet gno u het mir es Elma Patch bym Port häretah. Nach ere Stund het si's no Mau versuecht u s'het eifach nid wölle gah. No mit Hilf vo ren Andere Pflegefachfrou u nachdäm si beidi a myre Schultere umedrückt hei und ig wytergjammeret ha, hei si's ufgäh u es isch es Röntge aagmäudet worde. Da ig allei im Ruum ha müesse sy u myni Therapie mit der Kältehube mache, damit ig weniger Haar verliere, hei mir d'Chemo glych über d'Handglänk Vene u nid übere Port yneglah. Es het drum öpper uf dKühlmaschine vor Hube müesse warte bis ig fertig bi. I bi du, wo's so wyt isch gsy, is Röntge. Der Arzt het mir gseit, d'Chirurgin heigi s'Röntge aagluegt u gmeint: der Port syg zimmli wyt unger aber er liegi richtig. Es bruuch de eifach e längi Nadle. Dir dörft auso jetz scho derfür bätte, dass es nächst Mal uf Ahieb klappet!