Nach fasch zwöi Jahr hei mir gwüsst, dass mir gly zrügg id Schwyz wärde gah, das Mau mit em Flugzüg. Das het üs mega beschäftiget, drum hei mir das scho mal wuchelang g'üebt. Mir hei der Mäni is Wägeli packt u sy ufs Gygampfi. Bi de Biudli gseht me's. Das sy süsch no Impressione us Tiko.
Uf em einte Biud wo mir am Bade sy, gseht me üses Schysshüsli. Mir hei das nid im Huus inne gha. Wenn's grägnet het, hei mir der Schirm müesse näh u sy o so nass worde. Es rägnet i de letschte Jahre mängisch o hie e chly ähnlech fescht wie's dört tah het. Da isch aube innert Minute aues unger Wasser gsy. D'Strasse hei sech zu Flüss verwandlet u de het me di grosse Löcher ir Strass nüm gseh, was alles no gfährlecher gmacht het. In Tiko het's aube e Rägezyt gha vo zwöi Mönet. I dere Zyt isch alles füecht blybe. Es isch gsy wi im ne Trybhuus. Alles isch megaschnäll gwachse. Es het überall schöni Pflanze gha. D'Orchidee sy wi Gjät gwache. Um üses Huus um het der Papi e Zuun mit Hibiskus gmacht.
Ir Trockezyt het's niene Schatte gha ussert unger de Bambusstrücher. S'Mamie het's scho gwüsst, drum het sy aube ihre Hochzytsschleier übers Wägeli vom Mäni gspannt u het ihn den Ängle anbefohle. Es isch nämlech so, dass sech di grüene u schwarze Mambas am liebschte i de Bambusstrücher tummle u sech gärn eifach löh la abegheie, wenn öppis drunger isch. Mir hei tagtäglech Bewahrig erläbt!