Scho wo mir mit em Schiff uf Kamerun sy, hei mir üse grau/beige VW Bus im Gepäck gha. Der Papi isch viu mit däm ungerwägs gsy. S'Mamie het ersch später s'Outofahre glernt. D'Strasse in Kamerun sy Ändi 60 er Jahre eigetlech meh Piste gsy...Es het fasch bi jedere Reis e Pladdi ggäh u mängisch sogar e Achsebruch. D'Afrikaner sy scho denn, wi Hüt super im flicke vo Outos aller Art. I dänke, das wird zuenähmend schwieriger mit dene Komputer wo si Hüt sy.
We mir e längi Outofahrt hei gmacht, hei d'Eltere mit üs gsunge damit der Jonny u ig nid zangget hei. Der Mäni isch denn no Chly gsy u het sech o später lieber drusghaute. Dass mir so viel sy ungerwägs gsy het derzue gfüehrt, dass mir es schön ygsungnigs Quartett sy gsy. Papi, im Bass, Jonny, im Tenor oder en Oktav höcher, s'Mamie im Alt u ig im Sopran. Mir hei gly Uftritte gha, im Busch i de Chiuchene u später im Urloub ir Schwyz.
Es isch es paar Mal passiert, dass mir sy im ne Dorf aaghaute worde, wüu grad öpper isch ab em ne Boum gheit oder sech mit der Machete is Bei gschnitte het...De sy mir Chinder zämegrütscht u hei der Hingerscht Bank freigäh. Der Papi isch de denn aube schneller gfahre aus süsch. I mag mi guet erinnere wi dä Maa wo ab em Boum gheit isch im Delirium isch gsy u näbe mir, i üsem Bus gstorben isch. I bi denn knapp füfi gsy. I der glyche Zyt, isch e Bueb vo re wysse Frou vo Dütschland wo in Tiko mit em ne Kameruner verhüratet isch gsy unger e Zug cho u gstorbe. I mag mi so guet drann erinnere wi si drüü Tag u Nacht lang het müesse am Bode sitze u gränne u sich nüt het dörfe wäsche...Nach dene Täg isch de fertig gsy mit truure. Ja, es Läbe u vor allem es Chinderläbe het dört ganz en andere Wärt. O das het mi geng gstört, dass es ganz normal het söue sy, dass d'Froue u d'Chinder sy abgschlage worde. I bi also nid füfi gsy won ig mynen Eltere erklärt ha, dass ig nie wärdi en Afrikaner hürate. Es het mir denn scho Müeh gmacht, mi a di Kultur aaz'passe.