Tiko liegt im Südweste vo Kamerun, nid sehr wyt vor Nigerianische Gränze im Mangrovegebiet am Atlantik. Um i gwüssi Fischerdörfer z'glange, muess me mit em Kanu häre. Da der Papi aube am Sunndig o i so Dörfer het prediget, het er üs öppedie mitgnoh. Es isch aube es Erläbnis gsy, mit em Boot mit Motor, dür di Meeresarme z'navigiere. Es isch us eim Boum gmacht gsy, wie uf e Bild. De het mir s'Mamie es schöns Röckli aagleit aber es isch nie bis zum Gottesdienscht suber blybe...immer bin ig vorhär irgendwie no hurti i re Glungge umegumpet oder süsch bym Uskundschafte vor Gägend dräckig worde...I dene Dörfer hei si d'Hüser no uf Pfähl bout...
Es isch aber no öfter passiert, dass der Papi üs nid mitgnoh het, da är grad für einigi Täg ungerwägs isch gsy. Vor allem denn wenn är mit em Missionsleiter mitgangen isch hei mir gmerkt, dass är nid so gärn mitgeit. I ha erscht später mitübercho wiso. Myni Eltere hei üs e so erzoge, dass mir üs a der jewyligen Umgäbig u Kultur aapasst hei, o vom Ässe här. Es isch für üs klar gsy, dass mir das ässe wo üs üsi Gastgäber kochet hei. Der Missionsleiter het dört en anderi Ystellig gha. My Papi het de aube für ihn müesse Sache choche wo si mitgnoh hei. Das isch am Papi gäge Strych gange. Eines Tages, wo si mit em Eiboum ungerwägs i nes Fischerdorf sy gsy, isch plötzlech es ryyyse Babaneschiff vor ihne erschiene u si hei s ruckartigs Uswychmanöver müesse mache. Da isch fasch der ganz Bootsinhalt über Bord. Der Gaschocher u d'Konsärvedose sy gsunke, s'Trinkwasser hei si chönne rette u mym Papi syni Luune isch grad besser gsy wüu är gwüsst het, dass är das Mal nid wird müesse choche...Der Missionsleiter het scho Buuchweh übercho bym drahdänke, dass är afrikanisches Ässe muess zu sich näh...
Di kamerunischi Chuchi isch nämlech mega feiiin u, wenn alles düregaret isch, o für üs bekömmlech!