I ha scho immer gärn Wasser gha, bi scho aus ganz chlyses Meiteli as Meer, da myni Eltere vor myre Geburt in Arles in Südfrankrych gwohnt hei.
Wo mir in Tiko hei gwohnt, wär ig am liebschte aube i Bach hinger üser Hütte go bade. Das han ig nid dörfe, da vieli Viecher dört gwohnt hei. Es het äbe Schlange gha, giftigi Chrotte, gfählechi Würm wo me nid gseh het, Warane u süsch no Getier.
Zwüschyne hets es gäh, dass sech der Papi am Samstignamittag frei gno het u mit üs furt isch. Im änglische Club vo Tiko het's es Swimmingpool gha mit em ne füf-Meter Sprungturm. I bi immer ufeklätteret u abe gumpet u der Papi het mi aube müesse us em Wasser zieh. Mit der Zyt isch es ihm verleidet un är het mi vorgwarnet, dass wenn ig so ne grossi wöu sy wo da abegumpet, ig o säuber us em Wasser chöng. Är isch zwar dernäbe gsy, het mi aber sälber as Ufer lah schwümme. Es het usgseh wie nes Hündli, aber i ha's gschafft. Vo denn aa bin ig gschwumme. I bi am liebschte unger Wasser gsy. No jetze lieben ig s'Wasser. Am liebschte zwüsche 29 u 36 Grad.