Gester am Nami han ig nid bap gmacht, i ha nume no gschlafe u ha mi am Abe ufgrafft zum Schrybe.
Hüt am Morge han ig am 06.10 Uhr mit mym Schatz zmörgelet, am 06.35 Uhr isch der Ältischt Suhn sys Kaffi cho näh u am 08.50 Uhr scho der erscht Bsuech cho. E pensionierte Fründ vor Familie wo sich im aktive Ruhestand vom Heilige Geischt laht la inspiriere, wo är grad bruucht wird. Är het mir vor Tage aaglütte u mir s'Angebot gmacht , mit mir cho z'bätte. Da ig ihn kenne u weiss, dass är ähnlech dänkt wie ig, han ig ihn yyglade. Er het mi mit Salböl us Jerusalem gsalbet, sinnbildlich für d'Chraft vom Heilige Geischt u IHM d'Freiheit glah, nach em Wille vom Barmhärzige Gott, in Jesu Name a mir z'würke. I weiss, ig wirde gsund, das WENN überlahn ig IHM. I bi innerlech Ruhig im Wüsse, dass Gott alles im Griff het.
Am 09.30 bin ig parat gsy für myni Mittwuchmorge Pouse mit Livenet. Hüt het d'Rachel Stössel üs ermuetiget uf Jesus z'fokussiere, wenn s'Läbe nid das mit üs macht wo mir üs gwünscht hei...
Am Mittag bin ig nach ere feine Bärnerplatte churz flattü gsy u ha sogar gschlafe. Am 15.00 Uhr isch e Fründin us alte Zyte uf Bsuech cho. Mir hei afangs 80-er Jahre zäme z'tüeh gha u üs lang nümm gseh gha. Es isch vieles ersch jetz erklärbar worde, was denn abgangen isch. Mir sy beidi ryyfer worde. Es het guet tah zäme über vieles z'rede. Nach em Znacht, hei mir se a Bahnhof tah u sy i Huuskreis, andernen Orte Smallgroup gnannt oder Chlygruppe. Es isch en Ort vom Ustuusch u Härzteile. Hinecht isch es ums "jüngerschaftechs Läbe" gange. Eigetlech s'glyche Thema wie am Morge: uf Jesus fokussiert läbe, ihm chönne ähnlecher z'wärde. Di andere hei so visioniert, hei sech drüber Gedanke gmacht, was si im Sinn hei, mit welne Fründe as si sech i Zuekunft wünsche s'härz z'teile. I ha plötzlech gmerkt, dass ig das im Momänt nüm cha. Dass ig mi innerlech am verabschiede bi, u das het weh tah. Eigetlech sy alli ahwäsende, Teil vo myre Familie u das tuet o ihne weh. Mir hei churz alli ghüület u das het guet tah. Es isch es Fentil wo mir dörfe bruuche. Der M. het no es Biud gha, dass Gott mi bis am Schluss wie ne Sunneblueme löng lah schyyne. Ja, das isch my Wunsch!
Nach em ne feine Glüehwyy u Dessert sy mir vory Hei cho.