Bym ufschrybe vo mym "Abszäss-Erläbnis" isch mir bewusst worde wyso ig der letscht Frittig e so negativ erläbt ha. I dänke, dass ig ohni das erläbt z'ha weniger weh hät gha. Es tönt jetz kompliziert, isch aber eifach: dür mys troumatische Erläbnis ir Chindheit, bin ig sensibler worde uf z'weni örtlechi Betäubig...Der Schmärz isch haut scho öppis sehr subjektivs wo me nid würklech cha mässe, wüu's jede anders gspürt, dür d' Brülle vo sym Erläbte...
Hut am Morge het mir s'E. der Port aagstoche. Das het mir scho weh tah, es isch aber im glyche Momänt vo re andere Pflegefachfrou mit em Yysspray gschprüeut worde. Si hei sech beidi voll um mi kümmeret, aus ganze Mönsch. Es isch schnäll verby gsy. I weiss, dass ig meh Schmärzpflaschter muess ufchläbe. Der Schmärzdokter u der Onkolog hei mir's beidi empfohle...so Chnocheschmärze tüege haut furchtbar weh, das chan ig bestätige! Der Kurt isch no mitcho zum Schmärzdokter u het mi im Spital abglade...
D'Chmo isch guet ynegange u d'Kälte-Hube han ig o möge verlyde. Es nimmt mi wunder ob mir d'Haar blybe, dank dere... Das geit aube 1/2 Stund vor der Chemo scho d'Hube, nächär ei Stund Chemo u druf abe um 1/2 Stund d'Hube. Öppis nach em eis het mi d'R.Hei gfahre. Danke!
Hüt am Nami han ig di ganz Zyt gschlafe...