Da ig viel dusse gsy bi, im Busch u im Dräck han ig immer verstocheni Bei u Arme gha. In Tiko isch e höchi Luftfüuechtigkeit u das bi 22 bis 38 Grad im Schatte. We der Thermometer uf 22 Grad isch, de hesch Kalt. Uf all fäll han ig scho immer extrem uf Muggestiche greagiert u ha aus Chind aube kratzet bis es blüetet het. Wägem "Dräckele" hei sech aube di Wunde entzündet u de het's immer wieder Abszässe ggäh. Es isch wieder Mau so gsy, dass ig en Abszäss im Bei ha gha. Das Mau isch es im Oberschänku gsy u der Papi isch wieder Mau für paar Täg im Busch am Bou vor Krankestation in Banga dranne gsy. Mys Bei isch total gschwulle gsy, e so dass ig nüm ha chönne loufe. Es het o scho e rote Streife ggäh, s'Bei ab. Mys Mamie het verzwyflet zu Gott gschroue. Si het mi i Syni Händ gleit, isch parat gsy mi lah z'gah. Plötzlech isch e französische Beck wo syni alte Baguettes lieber i Bach hinger üsem Huus kippet het statt se den hungernde Afrikaner z'gäh, derhär cho luege wi mir so primitiv chönni wohne. Wo ne s'Mamie gseh het, het si gschroue:" Du bisch en Ängu vo gott gschickt. Mys Chind muess sofort is Spital, süsch überläbt si's nid!" Dä Maa isch völli verdatteret gsy, het mi packt u mir sy sofort is Buschspital uf Tiko. Dört aacho, hei si mir ohni Betäubig i dä Oberschänku gstoche e so dass s'Eiter isch usegloffe. Da mys Mamie i dere Zyt a mym Kopf obe gsy isch, han ig se nid gseh u ha mi o vo ihre verlah gfüeht. I heigi auso Schreie abglah, wie nes Säuli bym schlachte. Der Franzos het üs nächär Hei gstelt u het üsi Hütte beguetachtet. Es het ihn beydruckt, dass e schwyzer Familie e so cha überläbe, ohni Strom, ohni fliessends Wasser. Denn het's o kener Handy ggäh. D'Mamie het ihm vo üsem Gott verzellt wo sogar ihn aus Ängu cha bruuche. Der Papi isch am übernächste Tag Hei cho. Nach em Ygriff het mi aube der John ufs Velo gsetzt u isch während sächs Wuche jede Tag mit mir is Spital go di Wunde useputze. das isch e Tortur gsy...I ha denn verschiedeni Lüt gseh wo ganz schlächt sy zwäg gsy, zum Byspiu e Maa wo Tetanos gha het u syni Krämpf ihn so richtig zämezoge hei, dass er gruusigi Grimasse gschrisse het. I ha vo denn aa wölle Ärztin wärde...