Won ig Vieri bi gsy, isch my jünger Brüetsch der Mäni, i re Katholische Gebärklinik in Tiko uf d'Wäut cho. S'Mamie het i dere Zyt o no grad my älter Brüetsch, der Jonathan ygschuelet. Es het immer wieder gfährlechi Situatione ggäh, wenn ig im Garte e Giftigi Schlange entdeckt ha oder, wenn ig wieder Mau ab by. Drum hei myni Eltere beschlosse, mi i di erschti klass z'tue. Es het drum ke Chindergarte ggäh.
I bi also ganz stolz, mit e chly meh als Vieri i di erschti Klass. Der Schock isch gross gsy, won ig gmerkt ha, dass ig ir ganze Schuel, di einzigi Wyssi bi. I ha bym Hei cho grännet u gseit, i wöu nümm gah. S'Mamie het mi am nächste Morge chönne überrede doch no Mau z'gah. Am Namittag bin ig Hei cho u hinger mir sy sicher füf Meitschi gloffe u hei mys Züg treit. Di einti, mys Täschli, di anderi, myni Schifertafele, di anderi mys Hüdeli, en anderi myni Kride... S'Mamie het mir wüescht gseit u gmeint: "Du bisch doch kei Prinzässin, dass di andere Dys Züg müesse trage, oder?" I ha du g'antwortet: " i cha nüt derfür. Si hei drum zangget, wär mys Züg darf Hei trage. Da han ig jedem öppis ggäh"