Hüt am Morge han ig scho am 07.15 Uhr müesse im Spital sy. Bis ig draacho bi, isch glych scho 08.30 Uhr gsy. I bi ufem schrage i OPS gfahre worde. Dört hei si mir uf e OP Tisch ghulfe u mi dört feschtgmacht. D'Infusion uf em linke Handrügge isch vor Anästhesie Fachfrou uf Aahieb dry cho. Si hei myni rächti Schultere mit ganz vielne Tüecher zuekläbt. Si hei nächär Tupfer i Desinfektionsmittu tüncklet u my ganz Arm dermi gwäsche) Es het mir rächt weh tah, wo si mi örtlech betäubt hei. I ha z'Gfüeu gha vieles z'gschpühre u won ig's gseit ha, hei si mir no mau e Sprütze ggäh. Vo der andere Anästhesie han ig nid viel gmerkt. Es het mi tüecht i sygi di ganz Zyt am rede gsy. I bi gfüehlt, richtig gmetzget worde. Wo si mi nächär id Tagesklinik gfahre hei, het's mi richtig übernoh. I ha s'lutter Wasser ghület...D'Pflegefachfrou het mi ermuetiget nume usez'lah. I ha's o befreiend empfunde. Wo d'Chirurgin cho isch u gmeint het i söu doch nid truurig sy, es sygi ja jetz drynne bin ig scho grad e chly hässig worde. I ha du nüt gseit aber, es isch haut öppe no so, dass d'Chirurge nid so Empathie chöi entwickel... Es churzes Video vom Even het mir i däm Momänt grad guet tah. Nach 1,5 Stund bin ig no i d'Onkologie go Schmärzpflaster hole.
My Schatz het mi no vor em Mittag abgholt. Daheime han ig nume wenig mögen ässe u bi uf d'Massageliegi. Der Mätthi het mir e Plastiksack mit Schnee ggäh zum d'Wunde chüehle...
Nach de Viere isch der David mit de zwei Schätzis cho. Es het mir guet tah di fröhleche Chind um mi um z'ha u doch bin ig froh gsy nächär ume Rueh z'ha.