Wo mir geschter am Abe sy is Outo gstiege u mir myni Rippi so weh tah hei, han ig mi z'erscht scho gfragt öb ig e Fähler machi, no furt z'gah...I ha du d'Reis uf Gunten guet überstande. D'Reception isch scho zue gsy, drum hei mir der Zimmerschlüssu am Tisch übercho. Es het es feins viergängigs Menü ggäh. Der Dessertwyy hei mir du is Zimmer ufe gno. I ha is Bett wölle. Mir hei es Design Zimmer buechet gha. Vor 38 Jahr han ig während myre Bibuschuelzyt, fasch sächs Mönet lang i genau däm Zimmer 87 gwohnt. Es gseht hüt nüm glych us, het aber immer no die atemberoubendi Ussicht wie uf de Fötteli ersichtlech.
I ha z'Gfüehl, syt der Chemo heissi Händ u Füess z'ha u bi eifach no chly müeder als süsch. Vo de Schmärze här merken ig no ke Besserig. I ha jetz zuesätzlech zu de 50 Microgramm Fentanyl bis 25 mg Oxynorm im Tag bruucht.
Hüt sy mir nach em feine Zmorgebüffet ume go liege. Der Kurt isch am 11.45 Uhr go Skifahre u ig bi is Restaurant go Zmittag ässe. Aaschliessend bin ig id Wellness. Es het mir guet tah. Im Jakuzzi han ig nume di schwächschti Sprudel möge verliede u bi nur kurz drinne gsy. Nach 15 Minute Biosauna, bin ig is Dampfbad. Nach emene Peeling han ig gmerkt, dass es scho zwöi isch, drum bin ig gly unger d'Dusche. Es het mir uf e 14.38 Uhr Bus glängt Richtig Thun. Am Lauitor hei d'E.u derH.R. uf mi gwartet. I bi mit ihne Hei go ne feine Orangesaft drinke u derzue z'brichte. Am 16.30 Uhr han ig mit der K. und em R. abgmacht. Es isch volls Timing gsy! Mir sy all drü grad glychzyttig am Ort aacho wo mir abgmacht hei gha. Si hei mi uf Wilderswil gstellt. Kurz nach myre Aakunft isch my Schatz o grad aacho. Es het als Vorspyys sächs feini Austere ggäh. Der R. het mir es feins Gschnätzlets u Rösti gkochet u der Kurt het es Raclette gässe. Mir sy gly nach em Ässe Hei gfahre. Syt Hinecht tüeh mir d'Lymphdrüese am Hals weh. I ha nid im Hals weh, sondern usse, unger u hinger den Ohre...I gah jetz is Bett.