Wo mir in Tiko sy aacho, isch üses Hüsli grad nöi gsy. Es het bi de Fänster kes Glas gha, nume Gitter, dass keni Tier yne chöme. I de erschte zwe Mönet, het der Papi über 60 giftigi Schlange rund u im Huus töt. Es sy grüeni u schwarzi Mambas gsy Viper oder sogar Kobra.
I ha mit knapp 4 Jahr nid chönne verstah, wiso mir s'Mamie bi 36 Grad im Schatte Gummistiefel aaleit. Si sy aube i eim Egge vom Garte z'finde gsy u ig bi Barfuess im andere am ume gumpe gsy. Es het immer Ching gha wo sy zu mir ch spiele.
Myni lieblingsbeschäftigung isch gsy: mit drüü Steine u Hölzi, es Füürli z'mache u i re alte Konsärvedose Chrüttli u süsch Pflanze us em Garte z'chöcherle u us z'koste. Es het o mängisch Buuchweh ggäh. Einisch hei mir so fescht afa giggele, dass der Thomas üse Gärtner isch cho luege. Är isch nid grad fründlech gsy, won er gmerkt het, dass mir syni Kanabispflanze kürzt hei...Myni Eltere hei o kei Ahnig gha, was das isch...