Gester am Abe het mys Mamie drü Mal aaglütte u nie han ig abgnoh. I bi nach der Chemo so K.O. gsy, dass ig sofort bi go liege. Am 20.30 Uhr han ig du z'Gfüehl gha, ig müess ihre doch no Guet Nacht säge. Si isch ufglöst gsy, am gränne. Di Pflegendi Person wo bi ihre mit de Medis verby isch, het sech grad es Momäntli chönne Zyt näh u het ihre abglosst. Wo si wyter gangen isch gsy, han ig grad aaglütte.
I ha Du mys Mammeli ermahnt: Trüebsahl blase bringi nüt. Si söll doch a das Schöne dänke, wo si i ihrem Läbe heigi dörfe erläbe. Si söll sech doch nid so lah abemache vo myne Umständ. I heigi ömu o viel Schöns erläbt u übrigends sig i doch no da!
Hüt am Mittag het se my Beschti Schwiegersuhn wo isch cho Zmittag choche, grad im Altersheim gholt. Si het mit üs am grosse Tisch Zmittag gässe u het nächär uf em Ruehbett ihres Mittagschläfli gmacht.
Myni Fründin d'R. het abgruumt u ig bi ume uf myni Massageliegi go liege.
Wo alli gange sy gsy han ig no chly mit ihre chönne plöiderle.
Der Pascal het se vory wieder Hei tah.
I bi so froh, darf si no usecho. I chönnti nümm zu ihre. I mag im Momänt nid use u vom Schnuufe här, han ig Müeh die ganz Zyt Maske z'trage. Hie hei mir viel Platz u chöi's mit der Distanz löse...
Ja, das ganze Gstürm um das Corona närvt mi mega!