Da nach üsere Akunft (Februar 1968)üses Hüsli no nid fertig bout isch gsy, hei mir di erschte Wuche uf der Missionsstation in Kumba gwohnt. das isch e ryysen umzuuneti Aalag gsy mit einige Hüser, mängem Guavaboum u süsch grosse Fruchtbäum. Am abe het aube für drü Stund e Generator Strom erzügt. Nächär muess me mit Petrollampe Liecht mache. Mi älter Brüetsch u d'Ching vom Missionsleiter wo grad i de Ferie sy gsy, hei Wasser us em Kühlschrank gno u sy mit dene i Garte gsprunge. I ha im Kühlschrank gluegt u nüt gfunde u ha du der nächsti Schaft uftah. Dört het's o e Fläsche mit Flüssigem gha. I ha se gno o aaghänkt...Nach em ne tolle Schluck het's mi glüpft. es het mi mega brönnt im Hals. I ha gschroue u d'Müettere sy cho z'springe. Bis mys Mamie mir Milchpulver aagrüehrt het gha, han ig scho toll erbroche. I heigi no Wuche lang nach Kerosin zum Muul us gstunke...