I bi grad vory Hei cho vom Spital Burgdorf.
Am 07.50 Uhr bin i go Leitig lege u Bluet gäh. Am 08.30 Uhr han ig e Termin gha bym Schmärzdokter. Syni MPA het mi versuecht z'erreiche. I ha aber uf Lutlos gstellt gha u s'nid ghört. Är isch krank gsy. Är isch haut o nume ne Mönsch...
Der Kurt isch ja mitcho, drum bin ig mit ihm uf Lyssach go liefere. I bi nächär uf d'Onkologie go waaarte. Um 09.30 Uhr wär der Termin gsy bym Onkolog. Es isch alles drunger u drüber gange, drum het er ersch gäg di 11i Zyt gha für mi. I ha mi entschlosse, mit der Kältehube z'therapiere. Das heisst 1/2 Stund vor u 1/2 Stund nach der Chemotherapie han ig e Hube anne wo dür Kälti myni Haarwurzle tuet zämezieh, sodass 80% vo der Froue d'Haar nid verliere. I ha mega gfrohhre. D'Chemo isch guet gange. I ha es starchs Antialergikum übercho wo mi sehr müed gmacht het. Drum han ig nid sälber dörfe Hei fahre. Am 13.50 Uhr bin i fertig gsy mit der Chemo u bi im Röntgen erwartet worde für nes Thoraxröntgen. Sie wei my 4. Ländewirbu u vielecht no nes Rippi wo brochen isch bestrahle, gäge d'Schmärze...
Am 14.30 Uhr han ig es Gspräch gha byr Chirurgin wo mir am Frittig e Port leit. Portkatheter – Wikipedia
Da ig denn es Teilnarkose ha, bin ig am 15.00 Uhr bym Narkosearzt bstellt gsy. i ha am 15.45 Uhr zu ihm chönne. Der Kurt isch scho länger z'Burgdorf gsy. Da ke Beiz offe het, und är für mi es warms Outo het wölle, isch är ums Spital ume gfahre...
Am Zischtig isch de für di nächste drü Mönet Chemo aagseit, wenn ig se ma verlyde...