I dere Zyt wo mir in Grenchen gwohnt hei, het d'Chile vo Ängland ihres Missionsfäld in Kamerun ar Schwyzer Chile übergäh. Somit het plötzlech der Missionsvorstand gwüsst wän frage für z'gah. Myni Eltere sy immer no parat gsy. Zu dere Zyt hei d'Missionare ihri Chinder ir Schwyz im ne Internat für Missionarschinder glah. My Papi het am Vorstand erklärt, dass zu ihm e Familie ghöri u, dass är nume mit ihre göngi. Im Januar 1968 sy mir du mit em ne Schiff namens General Le Clerc wo syni letschti Fahrt gmacht het, innert 16 Täg vo Marseille uf Douala gfahre. Es het ja müesse billig sy, drum sy mir ir dritte Klass gfahre...
Was ig no weiss vo dere Reis:
- In Marseille isch es Kalt gsy u es het viel gluftet wo mir yygstiege sy.
- Es isch mega spannend gsy zuez'luege wi d'Manne mit Krähn üse vollgladnig VW Bus yglade hei u süsch no so viel Kontainer u angeri Outo, sogar Laschtwäge.
- Im ne Hafe, i weiss nüm i welem, het e so ne Draht vom ne Krahn la gah. Das het mega bollet, wo dä Kontainer abegsädderet isch...
- Mys Mamie het immer wieder müesse erbräche. Si isch drum schwanger gsy. D'WC sy so öppis vo gruusig gsy! Überall isch es roschtig gsy. Es het o Kakerlake u süsch Chäffere gha...
- Einisch het üs öpper vor erschte Klass i ihres Restaurant zum Zvieri yglade gha. Der Kälner het üs no bevor mir irgendöppis hei chönne bstelle, wi Hünd usegschosse...mir ghöhri nid da häre...
- Da ir erschte Klass kener Chind sy gsy, het di Arbeitslosi Chindergärtnerin mi Brüetsch u mi mängisch gholt u zur Hingertüür i wunderschön Chindergarte ynegschmugglet u mit üs gspielt.
- Mir sy in Grand Canaria mit de Wintermäntle usgstiege u hei uf der andere Syte vom Hafe Lüt gseh bade...
- In Senegal hei mir ab em Schiff dörfe u sy a ne wunderschöne Strand südlech vor Stadt Dakar. Es het üs erstuunt, dass dört niemer badet het. Mir hei's der ganz Tag dört gnosse. I bi fasch geng im Wasser gsy. Wo mir am nächschte Tag mit em Schiff a däm Strand verby sy, hei üs d'Matrose erklärt dass dört niemer göng go bade wüu's voll Haie sygi...
- Es isch geng wärmer u füechter worde, je nächer mir gäge Kamerun gfahre sy.
- D'Lüt wo yygstiege sy, si geng wi farbiger worde u d'Gschmäcker vo ihrem Ässe geng wi intensiver.