Am erste Tag scho gsunge...
Da myni Eltere nach ihrer Theologischen Usbildig in Kolding, Dänemark u Penygroes, Wales England innerlech gwüsst hei, dass si Mau im ne Französischsprachige Land vo Afrika id Mission wärde gah, hei si sich in Frankrych lah aastelle. Dört isch my älter Brueder der Jonathan uf d'Wält cho. I dere Zyt het d'Apostolic Church vo Ängland e Missionar gsuecht für uf Kamerun. Si sy aagfragt worde, öb si wette gah, hei aber d'Ungestützig vor Schwyzer Chile wölle u das isch d'GFU (Gemeinde für Urchristentum, hüt BewegungPlus) gsy. Der Missionsvorstand het se aber z'erscht wölle kennelerne, drum het's gheisse: zrügg id Schwyz. Der Papi isch als Pastor zueständig gsy für d'Chilene in Solothurn, Grenchen u Biel. Zwöi Wuche nach ihrem Umzug(si hei no ke Krankekasse chönne abschliesse) bin ig am Morge vom 13.08.1964, Daheime in Grenchen SO uf d'Wält cho.
I heigi der ganz Tag gschroue...
My Brueder isch am Nami Hei cho. Er het es Kambly Fischli im Hosesack für mi ufbewart gha. Won ig da am schreie bi gsy, het är mir das Fischli is Muu tah. Der Papi het's zum Glück beobachtet u het mi, indäm är mi sofort gkehrt u ne Klaps uf e Rügge gäh het, vom Fischli befreit.
I heigi nächär wyter gschroue u mys Mamie heigi sich dermit tröschtet, dass ig äuä de Mau e gueti Stimm wärdi ha...