Geschter am Abe hei mir mit em P. u paar Fründe zäme gsilveschteret. Mir hei der ganz Abe zäme ggässe, trunke, brichet u eis Spieli gmacht. Öppe am 22.30 Uhr sy mir zäme use i Schnee go Rakete ablah. Es het genau zäh Rakete gha, für jedes eini. Mir hei vorhär es Zetteli draa kläbt wo mir e Grund zum Danke u ne Wunsch druf gschriebe hei.
I ha so viel Gründ zum danke! I ha bis jetz so viu i mym Läbe erläbt wi sälten öpper.
I ha mi vorletscht Jahr vom Töfffahre müesse verabschiede. My Maa het gwüsst, dass es my Troum isch öppedie chönne Cabrio z'fahre. Wo der erscht Lokdown isch gsy, hei mir afa im Internet umeluege, öb's günschtigi Cabrios hät. Im Luzärnische isch eis usgschriebe gsy. Der Kurt het ei Tag druf genau i dere Ortschaft en Uftrag gha. Er isch es go aaluege u, da eine vo üsne Söhn derby gsy isch, het er's grad gkouft. Mir sy jetz stolzi Bsitzer vom ne Copen.
I bi so froh hei der Kurt u ig letschte Summer mit em Matthias, der Sarah u am Pascal e Schwyzerreis gmacht. Mir sy z'erscht is Glarnerland uf Braunwald. Es isch am ne Sunndig gsy wo mir abgreist sy. Der Stephan het zum Geburtstag vo sym Schatz es paar Tag Ferie mit üs gschänkt übercho. Mir sy du mit em Copen, em Proace fürs Gepäck u für Matthias u Pascal zwöine Töffe gfahre. Uf em Susten obe het's e Platte ggäh bym Copen. Mir hei drüü Stung müesse warte bis eine isch cho der Copen abschleppe. Er het niene so chlyni Pneu gfunde, drum hei der Kurt u Stephan mit em ne Ersatzwage wyter müesse reise. In Braunwald sy mir ei ganze Tag gsy u hei zwöi Nächt im Cristal übernachtet. Nach em ne schöne Tag am Klöntalersee isch der Stephan ume richtig Hei zue. Mir sy wyter is Jugendhuus Seewis. Dört schaffet eine vo myne Cousins. Mir sy vier Nächt dört gsy. Vo dört uus sy mir für vier Nächt is Hotel La Romantica in Le Prese im Puschlav. Es isch so ne schöni Region u s'Ässe i däm Hotel isch sensationell gsy! Der R. het üs dört überrascht u isch vo dört us mit üs is Tessin uf Minusio. Dört hei mir für vier Nächt e schöni Wohnig mit drüü Schlafzimmer gha. Der R. isch wyter greiset. Im Wallis, in SaasFee isch d'Sabrina zu üs gstosse. Das sy ganz wunderschöni Ferie gsy! I chönnti no stundelang schrybe für was ig dankbar bi.