Am 23. han ig ja e Termin für ne Biopsie(Gwäbs Entnahm) us em Beckekamm. Hüt am Mittag isch es Telefon cho, es göng wäg der Anästhesie nid am Morge am Nüni, i söu neu am eis am Nami cho. I ha scho organisiert gha, dass der P. zum R. cha. Är isch froh, muess er nid so früeh ufstah. I fahre ihn de am Elfi zu ihre, fahre Hei u wirde nächär is Spital bracht.
Grad vory het s'Telefon glütte. Meistens isch es s'Grandmaman, we's lüttet. Drum het der P. abgnoh. I ha gly gmerkt, dass es nid si isch sondern e Maa. Es isch du mi Onkolog gsy wo gmeint het: "es gäb nüt müehsamers, als während de Festtäg Ungersüech u Resultat müesse z'ha. Es syg also immer öpper ume, wenn ig es Problem heigi."
I füehle mi i guete Händ...schlussändlech luegt no en andere zu mir...