Am letschte Mändig han ig ja am Morge s'Gpräch gha u am Nami s'CT. Übere Mittag hei der Kurt u ig zu P. u R. chönne. Si hei üs vor acht Jahr o scho begleitet gha. I bi denn vorhär zum P. is Coaching. Won är vernoh het gha, dass ig erchrankt bi, isch er am glyche Tag zu üs Hei cho u het sech für alli Zyt gno. Er isch mängs Jahr als Seelsorger im Careteam vor Kantonspolizei gsy. Das het me guet gmerkt. Mir hei am Mändig bi ihne dörfe Zmittag ässe u brichte, was grad z'oberst gsy isch u hei gester am Abe mit ihne abgmacht gha. Si sy mit feiner Züpfe u mne usgläsnigem Wy cho. Es het guet tah usz'tuusche u ungezwunge zäme Znacht z'ässe. Am Schluss hei mir no zäme bättet.
I bi froh darf ig mit myre Chrankheit zu Gott cho u z'wüsse, dass mi no anderi derbi ungerstütze. I bi froh um alli Gebät wo für mi i Himmu stige u wott wi Jesus säge: nimm doch dä bitter Kelch vo mir aber nid my Wille sondern DI WILLE SÖU GSCHEH!
I haGester am Namittag am vieri im Spital nachegfragt, wiso as ig geng no nid ufbotte syg worde. Si hei irgendwie myni Amäldig vernuschet...i darf hüt am Morge nachefrage...Der P. het mir erklärt, dass Geduld nid öppis neutrals sygi. Hie d'Erklärig: Der griechische Ausdruck hypomoné bedeutet eigentlich »Darunterbleiben.« Doch nicht so, dass man willenlos über sich ergehen lässt, was da kommt; sondern so, dass man unter dem Druck widriger Verhältnisse oder feindlicher Mächte an seiner Überzeugung festhält und auf Befreiung hofft.
I der hüttige Bibuläsi han ig Hebräer 12, 1b: Lasst uns laufen mit Geduld in dem Kampf, der uns bestimmt ist.
Es isch gester äuä glych z'viel los gsy...bym bätte han ig wi der Chrampf gha dört wo myni Brust wäg isch. I ha grad Atemnot übercho u ha uf d'Massageliegi müesse. I bi nächär is Bett u ha es Zytli bruucht zum yschlafe, bi die Nacht es paar Mal uf u ha am vieri nüm chönne schlafe...Schrybe tuet mir guet...