I ha gester im Spital gmerkt, s'Masketrage macht mir mega Müeh. I ha geng z'Gfüel z'ersticke... Am Abe bin ig lang ir Cantina gsy. I ha chly "Logorröh" gha das heisst, dass ig viiiel glaferet ha. Danke allne wo mi i so Momänte ushalte... I ha mit em trunkene Gin Tonic besser gschlafe als mit em Tramal, letscht Wuche...
Der Onkolog het mir scho hüt am Morge aaglütte u gseit si heige gester uf de Bilder vom CT d'Ableger ir Läbere nid gnue chönne lokalisiere, dass es gnueg Gwäb zum punktiere gäb. I heigi im Beckekamm e grössere Herd wo si de wei e Gwäbsentnahm mache. I bi dankbar tüe si mir nüt ar Läbere mache...
I ha hüt am Morge R. uf Bsuech gha. Es het mir guet tah z'brichte. So ne Fründin isch Gold wärt! Im Momänt mahn ig no Lüt um mi ume ha aber doch nid z'viel.
I bi grad Hei cho u bi chly gfruschtet. Es git nüt wo im ne settige Fall besser hilt als Fentanyl...Es macht mi richtig hässig! Der glych Arzt wo mir het ghulfe wäg vom Gigt het mir erklärt, dass es ke Alternative git bi settigne Schmärze...
I ha vory grad mit mym Mameli es Telefon gha. Der Papi isch ja vor drüü Jahr gstorbe u si isch ja jetz scho 7 Jahr im Alters und Pflegheim Landblick in Grosshöchstetten. I mag das im Momänt nid verlide, wenn si am Telefon grännet. I muess mi so dermasse zämenäh, mi nid z'fescht ufz'rege, wenn si mi xMal s'Glyyche fragt u total chlammeret. Si tuet mir so Leid! I gloub, i würd no blööder tue...we eis vo myne Chinder so öppis hät...