I bi syyt em drü wach u ha, statt mi z'ärgere, dass ig nid cha schlafe, a mym Buech wytergschriebe. I wett mys Erläbte niederschribe solang ig no cha. I bi gspannt wie wyt as ig chume. Jetz steit my Schatz uf, es isch sächsi. I machen ihm u mir es Kaffi.
Uf di zähni chunnt är mit uf Burgdorf.
Der Krebs isch zrügg
I bi so froh, dass der Kurt hüt am Morge mitcho isch. Me weiss no nid was ig für ne Krebssorte ha. Drum hei si hüt nomal es CT vor Lunge u vor Läbere gmacht. Es het chlyni Ableger im Lungefäll, i de Lymphe u ir Läbere. Di starche Schmärze won ig ha gits wüu's der Krebs Löcher i Chnöche verursacht het u drum a drüne Orte Rippebrüch het ggäh. Byr Wirbusüüle het der Krebs vor allem der 4. Ländewirbu aagkätschet... Er isch bösartig u nümm heilbar. Myni Läbeserwartig hanget vo vielem Ab, vor allem dervo, was es für ne Krebssorte isch u weli Therapie aaspricht. Bis zur Wiehnacht sötte mir e Therapieplan ha. I cha wäg de Schmärze Morn zum Schmärzdoktor wo mi bi mym Morphiumentzug ungerstützt het. I bi froh um öich alli u für jedes Gebät.