Am 06. Oktober han ig wölle öppis us der Abwäschmaschine näh u's het e Chlapf i mym Rügge gäh. Sytdäm tuet's mir weh. I ha mi bym Huusarzt gmäldet u ha am 08. chönne gah. D'Ärztin het mi gröngget u het mi grad für nes CT aagmäudet. Si het gseit, es syg im Lungefäll en Erguss. Am Rügge het me nüt gseh. Am 12. bin ig bi ihrem Maa go über's Röngge u myni Schmärze rede u är het no Mau glost. I ha weh gha bym Schnuufe...Er het mir all 14 Tag Osteopathie verordnet. Am 14. Oktober isch s'CT gsy. Am 15. hei mir der Bricht u d'Bilder zäme aagluet. Am 22. bin ig scho ume bi ihm gsy wäge starche Schmärze. Blöderwys han ig grad müesse hueschte. Der Arzt het du grad en anderi Maske aagleit wo schützt u ne Brülle u het der Coronatest gmacht. I ha Mittu übercho wo mi Blämm gmacht hei, weh han ig glych gha. I bi bis am Mändig in Quarantäne gsy u ha am Mändig negative Bscheid übercho. Am 29. bin ig zur Osteopathin G. Si het mir chly chönne d'Spannig löse won ig im Äcke ha. Am 3. Novämber bin ig scho ume bim Dr. go "jammere" mir hei beidi ke Aahaltspunkt gha u dä Erguss im Lungefäll isch z'chly gsy für chönne z'punktiere...im CT hei si im Röntgeninstitut nüt Verdächtigs gseh...Am 10. bin ig zur Osteopathin C. Si het mir Druck gmacht, mi bym Arzt z'mälde wo myni Kräbsgschicht kennt het u het mir gseit es gfau ihre gar nid. I ha am 12. sofort zu däm Arzt chönne u är het am Tumorboard am 19. d'CT Bilder aagluegt u besproche, was wyter, het mir grad aaglütte u mi im Spital zu re Punktion lah ufbiete. Di Ärztin wo hät sölle punktiere het fasch nid gwüsst, wie mir das byz'bringe, dass si's lieber nid macht. Si het mir gseit, es syg unger der Lunge uf der Syte vor Milz u es syg z'gfärlech d'Lunge z'breiche.
Si het so näbeby gseit, es syg ja no öppis ir Wirbusüüle u uf der Lunge...
A däm Abe bin ig froh gsy, ke Punktion gha z'ha. I bi mit mym Schatz u Fründe is Luzärnische go der Hugi luege. https://www.komiker-hugi.ch/hugi-live Das het mir guet tah z'lache. O s'Ässe isch fein gsy.
Da di Punktion nid het chönne gmacht wärde, bin ig für ne http://www.mri-roentgen.ch/angebot/petct/was-ist-petct/ ir Insel aagmäudet worde.
Es isch am 4. Dezämber aagsetzt worde. I bi denn am 09 Uhr für 1,5 Stund ir Insel gsy. Am 7. bin ig ume zur Osteopathin C. Si het mi nid wölle ar Lunge behandle, het o ne Verdacht g'üsseret, dass es o mit der Läbere chönnt z'tüeh ha...Am 10. han ig mit em Arzt abgmacht gha, dass är mir nach em Tumorboard ume aalüttet. Di Spannig isch schwär usz'halte gsy, nid z'wüsse was los isch... Am 08.00 Uhr han ig es Telefon vor Praxis übercho, das Tumorboard syg so spät aagsetz, dass es ihm nid längi derby z'sy. Am 11.30 Uhr han ig vor Onkologie vom Spital Bscheid übercho, i heig am Mändig 14. Dez. am zähni e stündige Termin bim Dr. B. I ha am Nami vom 10. myre Osteopathin aaglütte u ihre alles verzellt. Si het mir der Tipp ggäh ir Onkologie aaz'lütte u z'säge, dass ig wett wüsse...Der Dr. B. het mir nach ere Besprächig aaglütte. I bi grad am Ching goume gsy. My jüngscht Änkel isch uf mire Brust gläge u syni Schwoscht uf mym Arm Abgstützt. Der Arzt het mir klare Wyy ygschänkt. Es syg bösartig u heigi Ablege ir Lunge, Läbere u im Rügge heig's es Loch im Chnoche... Di zwöi hei mi mit ihrer Nächi ufgfange: der Chly het friedlech gschlafe u si het nach em Telefon s' Lied vom Peter Reber afa singe: https://www.youtube.com/watch?v=JL54-7pT9yM
Hüt han ig s'Bedürfnis übercho ume e Blog z'schrybe...